|
Наманганда қалинлиги 1 метр келадиган йўл қурилмоқда
| 2013-09-22, 5:39 AM |
Фарғона водийсини мамлакатимизнинг бошқа ҳудудлари билан боғлайдиган А-373 автомобиль йўли, яъни Қамчиқ довонининг Наманган вилоятидаги 76 километрлик қисмида реконструкция ишлари бошланди.
“Қамчиқ”, “Чинор” назорат ўтказиш масканлари оралиғидаги мазкур йўл тоғдан ўтади. Айни пайтда йўлнинг 185-190 километрларида реконструкция ишлари давом этмоқда. Ишлар якунига етса, нафақат йўл текисланади,балки бир кеча-кундузда 15-18 мингта, жумладан, 40-60 тонна юк кўтарадиган ўта оғир автомобилларни ўтказадиган автомагистрал халқаро андозаларга мос ҳолга келтирилади.
Ўзбекистон Республикаси Давлат архитектура ва қурилиш қўмитаси Наманган вилояти “Давархитектқурилишназорат” инспекциясининг қурилишда стандартлаштириш ва сертификатлаштириш бошқармаси бошлиғи Рустамжон Сулаймоновнинг ЎзА мухбирига маълум қилишича, янги йўл қопламасининг умумий қалинлиги бир метрни ташкил қилади. 49 сантиметрли пастки икки қатлам шағал-қум аралашмаси, учинчи қатлам 20 сантиметрли цемент-шағал-қум, энг юқори қатлам эса 31 сантиметрли цемент-бетон қоришмаси билан қопланади. Бу бетон қоплама ўта мустаҳкам ва сифатли бўлиб, йўлнинг камида 25 йилдан 50 йилгача хизмат қилишини таъминлайди.
Бундан ташқари, йўлнинг ҳар икки йўналишини уч тасмали қилиб кенгайтириш, Резак ва Қамчиқ тоннелларининг ёритиш, ҳаво алмаштириш, ёнғин хавфсизлиги тизимларини модернизация қилиш ҳам кўзда тутилган.
Автомагистралнинг бу участкасида реконструкция ишларини келгуси йилда якунлаш режалаштирилган. Шунингдек, йўлнинг Наманган шаҳригача бўлган қисмига ҳам асфальт ётқизиш кўзда тутилмоқда.
|
Bolimlar: Yangiliklar | Kiritdi: Admin
|
Korildi: 10139 | : 0
| Baholar: 5.0/1 |
|
|
|